ប្រទេសកម្ពុជាកំពុងស្ថិតនៅលើផ្លូវមួយដើម្បីសំរេចគោលដៅនៃការចាក់វ៉ាក់សាំងចំនួន៧៥% នៃចំនួនប្រជាជនពេញវ័យរបស់ខ្លួននៅដំណាច់ឆ្នាំនេះ។ ការចាក់វ៉ាក់សាំងកំពុងដំណើរការនៅក្រុងតាខ្មៅ ខេត្តកណ្តាល ខណៈដែលរាជធានីភ្នំពេញគ្រោងនឹងចាក់វ៉ាក់សាំងឱ្យបានពេញលេញនៅពាក់កណ្តាលខែក្រោយនេះ។

អ្នកនាំពាក្យក្រសួងសុខាភិបាល និងជាប្រធានគណៈកម្មាធិការជាតិនៃការចាក់វ៉ាក់សាំងកូវីដ-១៩ លោកស្រីវេជ្ជបណ្ឌិត ឱ វ៉ាន់ឌីន បានមានប្រសាសន៍ថា រដ្ឋាភិបាលកំពុងស្ថិតនៅលើផ្លូវដើម្បីបញ្ចប់យុទ្ធនាការចាក់វ៉ាក់សាំងរបស់ខ្លួននៅរាជធានីភ្នំពេញនៅខែក្រោយនេះ ខណៈដែលមនុស្សជាង២លាននាក់បានចាក់វាក់សាំង។ ដោយសារការមកដល់នៃវ៉ាក់សាំងថ្មីពីប្រទេសចិន លោកស្រីបានមានប្រសាសន៍ថា ការចាក់ថ្នាំវាក់សាំងនេះកំពុងត្រូវបានពន្លឿន។

លោកស្រីវេជ្ជបណ្ឌិត ឱ វ៉ាន់ឌីន បានមានប្រសាសន៍បន្ថែមថា គិតត្រឹមថ្ងៃពុធនេះមនុស្សពេញវ័យចំនួនជាង១,៧លាននាក់នៅក្នុងរាជធានីភ្នំពេញ បានចាក់ថ្នាំវ៉ាក់សាំងចំនួនពីរលើករួចហើយ នៅសល់ប្រជាជន២៥ម៉ឺននាក់ទៀតដែលគ្រោងនឹងទទួលការចាក់វាក់សាំងរបស់ពួកគេនៅខែក្រោយ។ នៅទូទាំងប្រទេសប្រជាជនជាង២,៨លាននាក់ហើយដែលបានចាក់វ៉ាក់សាំង។

នៅពេលការចាក់វ៉ាក់សាំងនៅរាជធានីភ្នំពេញជិតដល់ពេលបញ្ចប់ ការចាក់វាក់សាំងនៅខេត្តកណ្តាលក៏កំពុងត្រូវបានដំណើរការ។ ក្រសួងសុខាភិបាលនឹងចាប់ផ្តើមចែកចាយវ៉ាក់សាំងទៅខេត្តព្រះសីហនុ កំពង់ស្ពឺ កំពង់ឆ្នាំង ស្វាយរៀង និងកំពង់ចាម ស្របតាមយុទ្ធសាស្ត្ររបស់រាជរដ្ឋាភិបាល។

សំរាប់នៅតាមខេត្តនីមួយៗ ការចាក់វ៉ាក់សាំងត្រូវបានអនុវត្តមុនគេនៅក្នុងទីតាំងដែលមានហានិភ័យខ្ពស់មុនពេលត្រូវបានដាក់ចេញឱ្យប្រើនៅកន្លែងផ្សេងទៀត។ លោកស្រីវេជ្ជបណ្ឌិត ឱ វ៉ាន់ឌិន បានអំពាវនាវដល់ប្រជាពលរដ្ឋនៅតាមបណ្តាខេត្តដែលមិនទាន់បានចាក់វ៉ាក់សាំង សូមមេត្តាអត់ធ្មត់ និងរង់ចាំវេនរបស់ខ្លួនដើម្បីចាក់វាក់សាំងដែលនឹងមកដល់ក្នុងពេលឆាប់ៗនេះ។